Myanmar-ah inthlan thawh hnihna nei dawn

Myanmar ram inthlanpui thawh hnihna chu naktuk, Pathianni hian neih a ni leh dawn. Vote thlak thawh hnihna hi sttate leh region 12 huam chhunga township 100 ah neih a ni ang. Inthlan thawh thumna leh a tawpna ber tur chu January 25 ah an nei leh dawn.

Inthlan thawh khatna hi December 28 khan township 102 ah neih a lo ni tawh a ni. Sipai sorkar kaihhruaina hnuaiah inthlanpui hi buatsaih a nih avangin spai thlawp, Union Solidarity and Development Party (USDP) chu hnehna chang tur chiangsaah ngaih a ni.

Thawh thuma neih tur inthlanpuiah hi political party 57 in an chuh a, ram pum huapa chuh chu party paruk chauh an awm thung. Mahse, party tenau tak takte an nih vangin USDP khing pha tur an awm lo. Kum 2015 leh 2020 inthlana hnehna changtu, Aung San Suu Kyi kaihhruai National League for Democracy (NLD) chu 2021-a sipai thuneihna hmanga an thuneihna paihthlak a nih hnuah, sipai sorkar dodalin inthlan neih tur atan pawh an party an regiter duh lo a, hei vang hian Union Election Commission (UEC) chuan an party hi a lo ṭhiahsak tawh bawk. Democracy thlawptu party lian dang pawh sipai sorkarin a ruat, UEC hian a lo ṭhiahsak hlawm a ni. Suu leh civil sorkara president Win Myint te chu tun thlengin hren an la ni.

December 28-a inthlan thawh khatna neihah khan vote pawh a tla chhe hle a, vote tla hi 52% niin UEC chuan a tarlang. A thawh khatnaah hian USDP chuan vote tla aṭanga 80% an hmu pha niin an sawi. Mahse, official result erawh tihchhuah a la ni lo.