Israel Foreign Minister-in Somaliland a tlawh

Israel foreign minister Gideon Saar chuan independent rama an pawm, Somaliland a tlawh a, president Abdirahman Mohamed Abdullahi nen an inkawm. Israel ram hruaituin Somaliland a tlawhna hmasa ber a ni.

Kum 1991-a Somalia dictator Siad Barre paihthlak a nih hnu khan Somaliland hian Somalia ram aṭangin independence a puang a ni. Israel hian nikum December thla khan Somaliland hi indpendent ramah a pawm a, ram dang zinga pawm hmasa ber a ni. Somalia ram hian Somaliland hi a ram angah a la ngaih reng avangin Israel minister-in a tlawh pawh hi an dem thu an sawi a, an ram chhunga inrelbawlnaa inrawlhah puhin an ngaithiam lo hle tih an tarlang.

Saar chuan president Abdullahi nena an inkawmnaah ram pahnihte inlaichinna chungchang an sawi dun thu a tarlang a, Israel-in Somaliland ram a pawm sawiselna pawh chhang nghalin, mi dang dodal tum zawnga siam an nih lo tih a sawi. Israel chuan a ram pawm tur leh tur loh chu ama duhthu ngei zelin a siam a ni, a ti.

Somaliland president Abdullahi chuan Israel-in an ram a pawm chungchangah thutlukna huaisen tak an siam a ni tiin, ram pahnihte chu an thawhdun zel tur thu a sawi. Kum 2020-a US president Donald Trump hmalaknaa Israel leh Arab ram ṭhenkhatten inremna an siam, Abraham Accords pawh an zawm ve tur thu a sawi.

Israel prime minister Benjamin Netanyahu chuan Saar kaltlang hian Somaliland President hi an rama zin turin a sawm a, a sawmna hi a pawm nia sawi a ni bawk.