Iran-a nawrh huaihawtnaah mi 35 an thi tawh

Iran rama an ram economy tlahniam leh, thil man sang zel duh lohna lantira nawrh huaihawtnaa innawr buaina thlengah nimin thleng khan mi 35 an thi tawh tih activist-te chuan an sawi. Nawrh hi huaihawt chhunzawm zel an tum tih an sawi bawk.

U.S.-based Human Rights Activists News Agency chuan kar khat chuang nawrh huaihawt tawh niin, an zinga 1,900 chuang man an ni tih a tarlang. Iran-a province 31 zinga 27-a hmun 250 chuangah nawrh hi huaihawt a ni. Nawrh huaihawtte hi security force-te nen an innawr buai fo a, thi zingah hian naupang pali bakah security force member pahnih an tel. Fars news agency chuan buaina chhuakah police officer 250 leh Basif force volunteer member 45 an hliam niin an sawi.

Tun ṭum nawrh huaihawt hi kum 2022 hnua Iran rama nawrh huaihawt lian ber a ni a, an ram economy tlahniam zel vanga lungawi lohna lantir niin, an ram hotu lu ber, Supreme leader Ayatollah Ali Khamenei leh a rorel dan duh lohnate an tilang chhunzawm bawk.

US president Donald Trump chuan Iran dinhmun chu an thlithlai reng tih sawiin, security force-te kuta nawrh huaihawtte an thih belh zel a nih chuan Iran thuneitute chuan US kut an tuar na hle dawn tiin a vau. Israel prime minister Benjamin Netanyahu pawhin nawrh huaihawtte a thlawp thu a sawi ve bawk.