Iran-ah nawrh huaihawt leh security force-te innawr buainaah mi 7 thi

Iran rama thil man sang leh an pawisa hlutna tlahniam avanga lungawi lohna lantira nawrh huaihawt chuan zual lam a pan zel a, khawpui hrang hrangah nawrh huaihawt leh security force-te innawr buaiin, Ningani khan an innawr buaina avang hian mi pasarih an thi.

Pathianni aṭang khan nawrh huaihawt hi ṭan niin, kum 2022 hnua Iran rama nawrh lian ber a ni. A tirah chuan an ram pawisa hlutna tlahniam leh thil man sang chak avangin Tehran-a Grand Bazaar-ah lungawi lohna lantir a ni. A hnuah zirlaiten nawrh hi zawmin, sorkar leh an ram hotu lu ber, Supreme Leader Ayatollah Ali Khamenei duh lohna an lantir tel a, dictator an duh loh thute an aupui zui a ni. Nawrh huaihawt vang hian school, university leh public institution hrang hrangte chu khar an ni.

Tehran khawpui bakah Karaj, Hamedan, Qeshm, Malard, Isfahan, Kermanshah, Shiraz leh Yazd khawpuiahte lungawi lohna hi lantir a ni a, police-te chuan pungkhawmte hnawh darh nan tear gas te an hmang. Iran sorkar chuan nawrh huaihawtte thil ngiat pawh an hriatpui tih sawiin, an thil phutte pawh dawhthei taka an ngaihthlak sak tur thu a sawi a, buaina siam zawnga che lo turin a ngen.

President Masoud Pezeshkian chuan interior minister chu nawrh huaihawt aiawhte bia a, an harsatna chinfel dan ngaihtuah pui tura a tih thu a sawi. An ram pawisa hlutna tlahniam avanga Iran central bank governor, Mohammadreza Farzin banna thehlut chu pawmin, a thlaktu atan economy leh finance minister hlui, Abdolnasser Hemmati a ruat nghal a ni.

US state department chuan nawrh huaihawtte an thlawp thu sawiin, an huaisenna chu fakawm an tih thu an tarlang. Sorkarin policy dik lo leh economy kalpuina dik loh dan sawichhuak a, an ram zahawmna leh dinhmun ṭha zawk a awm theihna atana beitute chu an thlawp tih a sawi.