US-ah Trump leh Zelenskyy inbia

US president Donald Trump leh Ukraine president Volodymyr Zelenskyy te chu Thawhṭanni khan Palm Beach, Florida-a Mar-a-Lago club-ah an inbia. Trump chuan Ukraine-Russia indona tihtawp a nih theihna turin  inremna siam a nih thuai tur thu a sawi.

Zelenskyy nena an inhmuh hma hian Trump leh Russia president, Vladimir Putin te chu phone-in an inbe bawk. Russia hian kum 2022 February thlaa Ukraine a run hnuah ram pahnihte hi tun thlengin an la indo chhunzawm reng a, Russia hian Ukraine ram 20% vel chu a thununna hnuaiah a dah tawh a ni.

Florida-a Zelenskyy leh Trump te inbiakna hi ṭha taka neih ni mah se, inremna erawh an la ziak thei lo. A bikin Russia-in Ukraine ram a thunun chungchangah an la inrem thei lo nia sawi a ni. Trump chuan indona tihtawp a, inremna a awm theihna tura ruahmanna siam 20 zinga 90% chu an pawm tlang thei tih a sawi. Kar leh lamah inbiakna nei chhunzawm tur hian US leh Ukraine team-te an inhmu leh ang.

Hruaitu pahnihten inremna an la neih theih lohna chu Ukraine khawchhak lam, a tam zawk Russia thununna hnuaia awm mek, Donbas bial chungchang a ni tih Trump chuan a sawi. He hmun hi demilitarised zone-a puan rawtna chu Ukraine lam hian an la pawm thei lo. Russia hian Donetsk bial 75% leh a ṭhenawm, Luhansk bial 99% vel chu a thunun a, heng bial pahnihte Donbas tia sawi an ni. Russia chuan Donbas bial a thunun mekna hmun aṭang hian Ukraine chu inhnuhdawk turin a phut a; mahse, Ukraine lam hian an duh bik lo a ni. Russia-in Ukraine ram a luah chungchangah Trump pawh hi a ngaihdan a danglam fo a, September thla khan Ukraine-in a la let leh thei dawn nia a sawi hnuah, helai ram lak let chu thil harsa leh khirh tak a nih tur thu a sawi leh a ni.