Myanmar-ah inthlanpui nei tan

Myanmar ram inthlanpui chu December 28, 2025 aṭang khan neih ṭan a ni. Inthlan hi thawh thuma neih a ni dawn a, nakkum January 11 leh 25 ah vote thlak chhunzawm leh a ni ang.

Tun ṭum inthlanpui hi kum 2021, February thlaa sipai chakna hmanga civil sorkar thuneihna hnehchhuh a nih hnua inthlan an neih hmasa ber a ni. Mahse, sipai sorkar hnuaiah inthlan hi buatsaih a nih avangin ram chhung leh ram pawn lam aṭangin sawisel leh rin tawk lohna a tam hle a; Myanmar-a pawl eng emaw zat, sipai sorkar dodaltute chuan inthlan hi an boycot bawk.

Sipai sorkarin political party-te in register dan turah dan khirh tak a siam avangin, inthlanpuiah hian party paruk chauhin an chuh thei a ni. Party lian ber leh chak ngei tura rin chu sipai thlawp, Union Solidarity and Development Party (USDP) a ni a, constituency eng emaw zatah chuhtu nei loin an tling tawh bawk a ni.

Kum 2020 inthlanpuia Parliament seat 90% la thei, Aung San Suu Kyi-i party, National League for Democracy (NLD) chu sipai sorkarin a ruat, election commission-in registration rules a siamṭhat hnuah a in register duh loh avangin ṭhiah sak an ni. Hei vang hian inthlanah pawh an chuh thei lo a, an hruaitu Suu Kyi hi sipai sorkar a din hnuah man niin tun thlengin hren a la ni a, thubuai hrang hrang an siamsakah thiam loh chantirin kum 27 tang turin an hrem.

Asian Network for Free Elecitons (ANFREL) in a tarlan danin, tun ṭum inthlanah hian kum 2020 inthlanpuia vote tla aṭanga 70% hmutu party-te chu ballot paper-ah pawh an lang tel lo. Politics kaihhnawiha thila man, mi 22,000 chuang hren mek an la ni bawk.