London police-ten Greta Thunberg man

Climate activist, Greta Thunberg chu Thawhlehni khan London-a Palestinian thlawptu, Palestine Action-in chaw ngheia nawrh a huaihawtnaah a tel a, London police-ten an man. Britain sorkar chuan kumin kumtir lam khan Palestine Action hi firfiak pawlah a lo puang tawh a ni.

Greta Thunberg hian Palestine Action thlawpna thuziak a keng a, Terrorism Act hnuaiah police-te chuan an man a ni. Palestine Action mi leh sate hian Gaza Strip-a Israel-Hamas indona thlengah Palestinian mite an thlawpna lantirin, kum tir lam khan airbase-ah lutin Royal Air Force Airbus A330 MRTT refueling aircraft pahnih an suasam a, rawngin a engine an kah bakah an tichhe bawk. Sorkar chuan an chet dan chu nawrh huaihawt dan pangngai a ni lo a, ram himna tiderthawng thei thil a ni tiin, June thla khan UK Home Office chuan firfiak pawlah a puang a ni.

Nawrh huaihawtte hian Palestinian activist man tawkte chhuah an phut a, nawrh huaihawt zinga pahnih chuan Lonon khawpui lailia insurance company office chu rawng senin an kap bawk. Hei hi Israel nena inzawm, defence firm Elbit Systems an thlawp vang niin an sawi.

Police-te chuan pawikhawihtute hi manin, a hnuah hmeichhe pakhat man belh leh a ni bawk tih an sawi. Mahse thubuai siamsak an la nih loh avangin an mi mante hming hi an puangzar lo thung.