US sorkarin dan loa pem lut, an ram lama kir duhte USD 3,000 zel pe dawn

US sorkar chuan an rama dan loa pem lutte dap chhuah leh thawn kir beihpui thlak hna a kalpui mekah, dan loa pem lut mahni duh thu ngeia kumin kum tawp hmaa an rama kir duh in report-te chu USD 3,000 zel a pe dawn tih a puang. Hei bakah an hawna tur thlawhtheihna chuan man pawh a tumsak dawn bawk.

Department of Homeland Security chuan thuchhuah hi siamin, dan loa pem lut, mahni thu ngeia kirte chu Krismas pualin thilpek hi pek an ni dawn tih a sawi. Mahni thua kir duhte chuan CBP (Customs and Border Protection) Home app-ah an inziak luh a ngai dawn a ni. He app-a inziak lut, US chhuahsan leh si lote chu sum chawi tir emaw, hremna emaw pek theih an ni thung ang.

Dan loa pem lut, CBP Home app-a inziak lut duh lote chu a hnuah beihpui thlakin man a, an rama thawn kir an ni dawn tho tih thuchhuah chuan a tarlang a, US-ah an kal phalsak an ni tawh ngai lo ang, a ti.

Kumin January thla aṭang khan CBP Home program-ah hian dan loa lut,an ram lamah kir leh tura inziak lut hi mtd 1.9 an awm tling tawh. Homeland Security Secretary Kristi Noem chuan an rama dan loa awm mekte chuan he programme hi hmang ṭangkai se a duh thu a sawi.