Myanmar-ah election law bawhchhiaah mi tam tak puh

Myanmar sipai sorkar chuan tun thla tawp lama inthlanpui nei tura an inbuatsaih meknaah, election law bawhchhiaah puhin mi 200 chuang thubuai a siam thar sak.

Sipai sorkara home affairs miniter, Lt.- Gen. Tun Tun Naung chuan inthlan tihbuai tum, mi 229 t e lakah action lak a nih tih a sawi. Heng mite hi mipa 201 leh hmeichhia 28 an ni a, thubuai siamak a nni, a ti. Eng ang thubuai nge siamsak a nih leh, eng zat nge man an neih tih erawh a sawilang lo.

Kumin July thla khan sipai sorkar chuan election law a lo siamthar tawh a, he dan hnuaiah hian inthlan neihtur tihbuai leh tihbahhlah thei zawnga thu sawi, punkhawmna buatsaih, duh lohna lantir leh lehkha thehdarhte chu kum thum aṭanga kum 10 thleng tantir theih a ni. Hei bakah pawisa chawitir theih an ni bawk. Hremna ṭhenkhatah phei chuan thi tura hremna pek theihte pawh a awm.

State media chuan election law bawhchhia, thubuai siamsak zingah hian filmmaker leh actor te bakah, People's Defence Forces member te, sipai sorkar dodaltute chi bil pawl member-te pawh an tel niin a tarlang. A tam zawk chu campaign poster tichhia, election worker-te vau leh social media-a inthlan awm tur sawisel zawng thu post-te an ni. Online news site, Myanmar Now pawh thubuai siamsak zingah a tel.

Sipai sorkar thupuangtu, Maj. Gen. Zaw Min Tun chuan inthlan neih turah chuan ram dangte an lungawi leh lungawi lohin awmzia a nei lo tih sawiin, ram dang tan ni loin Myanmar tan inthlan hi buatsaih tur a ni , a ti.