Bangladesh-ah zirlai hruaitu thihna vangin buaina chhuak

Bangladesh-a zirlai hruaitu, nikuma Sheik Hasina kaihhruai sorkar policy duh lohna lantir nawrh huaihawt leh, sorkar paihthlak a nih theihna atana pawimawh tak, Sharif Osama Hadi chu kar liam taa a lua kah hliam a nih hnuah Nigani zan khan a thi.

Hadi thih thu puan a nih hnuaah zirlaite leh amah thlawptu mi tam tak chu Dhaka University campus bulah an pungkhawm a, buaina a chhuak zui. Pungkhawmte hian Dhaka-ah kawng an zawh a, sorkar building eng emaw zat an hal a, an rama chanchinbu lian pahnih office pawh hal telin journalist-te an bei tel bawk. Nimin zing lamah erawh boruak a ziaawm deuh tawh niin thuneitute chuan an sawi.

Kum 32 mi, Hadi hi Inquilab Mancha platform thupuangtu a nih bakah, nakkum February thlaa inthlanpui neih turah independent candidate a ni bawk. Kar liam ta khan Dhaka-a election campaign hawnnaah hmai tuam, tu tih hriat lohten a luah an kap a ni. Tun kar tir lam khan Singapore-ah enkawl turin air ambulance hmanga hruai a ni a, doctor-ten theihtawp chhuah mah se a hliam tuar loin Ningani zan khan a thi tih Singapore Foreigin Ministry chuan a puang a ni. A ruang hi Dhaka-a phurh haw a ni ang.

Hadi thih thu puan a nih hnuah, mipui pungkhawmte chuan a thattute chu man chhuah thuai phutin lungawi lohna an lantir zui ta a ni. Police-te chuan Hadi kaptute hi an la zawng chhunzawm zel a, rinhlelh mi pahnih thalak pawh tichhuak tawhin, an chanchin leh awmna hrilh thei hnenah lawmman taka mtd 5 pek an tiam. Dhaka police thupuangtu, Muhammad Talebur Rahman chuan border security-te pawh hriattir an nih thu a sawi.

Bangladesh interim leader, Muhammad Yunus chuan Hadi sunna atan sorkar leh private building bakah, ram pawn lama Bangladesh mission hmunahte hnam puanzar a ngul chanvea zar a ni dawn tih a sawi. Nimin vek khan Hadi pualin ṭawngṭaina hun hman a ni bawk.