Israel-in Canada MP-te West Bank-a luh phalsak lo

Israel chuan Palestinian ram a luah, West Bank-a Palestinian official leh human rights advocate-te inbiakna neihpui tura Canada MP-te kal tum chu an luh a phalsak lo niin Canada civil society group chuan a sawi.

Canada Parliament member parukte chuan Jordan aṭangin West Bank hi an pan a; mahse, Israel thuneituten an luh remti loin an kir tir leh tih Thawhlehnia National Council of Canadian Muslims (NCCM) thuchhuah chuan a tarlang. MP-te zinna hi Canadian-Muslim Vote pawl huaihawt a ni. MP-te hi rorellai, Liberal Party member pakhat leh New Democratic Party (NDP) member pakhat an ni.

Advocacy group, Canadians for Justice and Peace in the Middle East (CJPME) chuan Israel-in an ram palaite a lo dang chu an dem thu sawiin, Canada sorkar chu Israel an in palai tawnna titawp tur leh, Israel ambassador pawh hnawtchhuak turin an phut. Group president, Yara Shoufani chuan Israel chuan dik lo takin Palestinian ram a luahsak a, Canada ram palaite lut tur lo dang turin dikna a nei lo, a ti.

Israel leh Canada hi hun rei tak inṭhianṭha tak an lo ni tawh a; mahse, kum 2023-a Gaza Strip-a Israel leh Hamas indona thlen hnuah Canada hian Israel chet dan demin an inkar boruak pawh a ṭha lo chho a ni. Canada hi tun hnaiah Israel-in a huat tak, Palestinian state pawmtu zingah a tel

tawh bawk.