Sri Lanka-in cricket captain hlui Arjuna Ranatunga man dawn

Sri Lanka sorkar chuan kum 1996 Cricket World Cup-a an champion ṭuma captain, Arjuna Ranatunga chu petroleum minister a nih laia eirua puhna kaihhnawihah man a ni dawn tih court a hrilh.

Ranatunga leh a unaupa te chuan oil procurement contract pek danah thil thlak danglamin, an mimal hlawkna turin an ti nia puh a ni. An thiltih avang hian sorkarin man to zawkin oil a lei a ngaih phah a, sorkar sum hloh hi Sri Lanka rupee mtd 800 vel a tling niin hemi chungchang chhuitu commission chuan a tarlang.

Arjuna Ranatunga hi ram pawn lamah a awm mek a, an rama a kir veleh man a ni dawn tih commission chuan Colombo magistrate Asanga Bodaragama a hrilh. Ranatunga u, Dhammika Ranatunga, sorkar hnuaia mi Ceylon Petroleum Corporation chairman hlui chu Thawhṭanni khan man a ni tawh bawk a, bail-a chhuah tir leh nghal a ni. Sri Lanka leh US khua leh tui nihna nei kawp a ni a; mahse, magistrate chuan Sri Lanka a chhuahsan a khapsak nghal a ni. Thla hmasa khan an unau zinga mi tho, tourism minister hlui Prassana chu insurance kalpui dana thil dik tawk lo tia puhin man a lo ni tawh bawk.