Vietnam-in ram dang mi khualzin mtd 20 nei tling

Vietnam ram chuan kumina ram dang aṭanga ram tlawhtu khualzin, foreign tourist mtd 20 a nei tling tawh. Covid-19 hri len hnuah, an ram tourism dinhmun chu a insiamṭha chho leh mek a, air pollution leh tuilian nasa tak an tuar chungin tlawhtu an pung zel tih culture ministry chuan a tarlang.

Vietnam ram hi tuipui kam zau leh thui tak awmte, a ram leilung mawi tak vang leh, an culture hausa tak avangin ram dang ngaihven an hlawh a, Southeast Asia-a khualzinte tlawh nasat hmun zingah a tel.

Thawhṭanni khan kumin chhunga foreign tourist mtd 20-na chuan Vietnam a lut a, hemi pual hian Phu Quoc Island-ah a lawmna hun pawh hman a ni tih Ministry of Culture, Sports and Tourism thuchhuah chuan a tarlang. Covid-19 hri len hmaa kum khata khualzin tlawhtu an ngah ber record chu mtd 18 a ni a, hei hi an khum der tawh. Kumina khualzin tlawhtu an neih tawh zat hi nikum aiin 19.3% in an tam tawh zawk bawk. Kum 2021 kha tlawhtu an neih tlem ber kum niin, foreign tourist 160,000 chauh an awm a ni.