Iran-ah Nobel laureate Mohammadi man

Nobel Peace Prize dawngtu, human rights activist Narges Mohammadi chu Zirtawpni liam ta khan Iran-ah man a ni leh.

Mohammadi hi Iran hmarchhak lam, km 680 vela hlaa Mashhad khuaah tun thla tir lama thi, human rights lawyer Khosrow Alikordi hriatrengna inkhawm buatsaihah a tel a, hemi hnu hian man a ni ta nia sawi a ni. Thuneitu lam chuan man a nih chhan engmah an la sawichiang lo.

Alikordi hi December 5 khan a office-ah thia hmuh ani a, official-te chuan heart attack vang niin an sawi. Mahse, a hnathawh avangin a hmain security leh judicial force-te vau leh man a tawk fo a, hei vang hian a thih chhan hi thil dang niin mi tam takin a ngai a, thu chiang zawk puang turin sorkar an phut.

Mohammadi hian Alikordi puala hn hmanah hian hmeichhiate chu an lu tuamna, hijab hmang loa kalk turin a ti a, amah ngei pawhin a hmang lo. A hmain man a lo ni tawh a, a hrisel ṭhat tawkloh vangin December 2024 khan jail aṭangin chhuah a ni. Thla thum chauh chhuah tura tih ni mah se, activist leh khawthlang ramte nawrna avangin pawhsei zel a ni. Kum 2022 khan security tibuai zawng leh sorkar kalphung dodala puhin thiam loh chantir a ni a, kum 13 leh thla 9 tang tura hrem a ni.

International human rights group-te chuan Mohammadi man a ni leh chu an dem thu sawiin, a awmna chin sawi chiang a, chhuah tir nghal turin Iran sorkar an phut. Mashhad prosecutor Hasan Hematifar chuan Mohammadi rual hian mi dang 30 chuang man ni bawk niin a sawi.