Israel police-ten UN refugee agency office dap

Israel police-ten Thawhṭanni khan East Jerusalem-a UN Palestinian refugee agency office an dap a, office-ah Israel flag an zar zui bawk.

Police-te chuan chhiah pek loh vanga office-te hi dap an nih thu an sawi a, mahse, agency lam chuan international law bawhchhiaah an puh thung.

United Nations Relief and Works Agency (UNRWA) hi hna an thawh danah duhsak leh awn lam nei nasaah Israel chuan a lo puh fo tawh a ni. East Jerusalem-a an building pawh kumin kumtir lama chhuahsan tur leh, an hnathawh chawlhsan tura hriattir an nih hnuah an hmang zui tawh lo nia sawi a ni bawk.

UNRWA hotu Philippe Lazzarini chuan Israel chet dan chu demin, UN hmun zah lohna a ni, a ti. Hmun danga UN awmna hmunte pawh a tih him loh phah niin a sawi bawk.

Jerusalem municipality chuan vawi tam tak warning pek an ni chungin UNRWA hian chhiah a pek tur, shekel mtd 11 (USD mtd 3.4) chu a pe duh lo tih a sawi. Hei vang hian dan ang taka hma la turin tax collector-te chuan an compound hi an luhchilh tih a tarlang.

Israel chuan kum 2023 October 7-a Hamas ten Israel an beih ṭum khan an zingah UNRWA staff ṭhenkhat an tel a, Hamas tana thawktu eng emaw zat an awm niin a sawi. Kum 2024 October thla khan Israel parliament chuan UNRWA chu an ram chhunga hna an thawh khapna dan a pass a, an official-te pawh agency hi bepawp lo tura tih an ni bawk.

UNRWA hian East Jerusalem-ah hna an thawk a, helai hmun hi UN chuan Israel in Palestinian ram a luahsakah a ngai. Mahse, Israel chuan Jerusalem pum chu a ramah a chhal thung. 1967 Middle East indona thlen hnuah, kum 1980 aṭang khan Israel chuan East Jerusalem hi a la ni.