Paris Louvre Museum-a tui putin lehkhabu tichhia

France khawpui,Paris-a museum hmingthang, Louvre Museum-a thla hmasaa tui put chuan Egyptian antiquities department-a lehkhabu za tel a tichhia. He museum hi tun hnaiah misualin rawkin, thil hlu tak tak an lo ru chhuak tawh bawk.

Specialist website La Tribune de l'Art chuan pipe ṭha tawk lo vanga tui put hian lehkhabu 400 vel a tichhia tih a sawi. Department lam hian siamṭhatna tur fund hi hun rei tak an lo dil tawh a, mahse, fund pek an nih loh avangin lehkhabu ten an chhiat phah ta niin a tarlang.

Le Louvre deputy administrator, Francis Steibock chuan tui pipe put hi Egyptian antiquities department library-a room pathumah a hma aṭangin an buaipui tawh tih a sawi. Kum eng emaw chen an buaipui tawh niin, nakkum September thlaa siamṭhat tura ruahman a ni, a ti.

October 19 khan chhun engah rukru paliin museum hi an lo rawk tawh bawk a, tlereuh hlu tak tak an ruk chhuahte chu USD mtd 102 vel hu nia chhut a ni. November thla khan Greek vase ho dahna gallery leh office chu a structure a ṭhat tawh loh avangin khar a lo ni tawh bawk.