U.S. immigration official-ten Harvard professor man

U.S. immigration thuneitute chuan, tun kar khan Harvard Law School tlawhtu professor Carlos Portugal Gouvea chu Yom Kippur hman a nih hmain, Massachusetts synagogue pawnah silai a hmetpuak nia sawi a nih avangin man a ni tih, U.S. Department of Homeland Security chuan Ningani khan a sawi.

Brazil mi Carlos Portugal Gouvea hi U.S. president Donald Trump-a kaihhruai sorkarin, 'anti-Semitic shooting incident' tia a sawi hnuah, U.S. State Department-in hun eng emaw chen chhung atan a non-immigrant visa a hlihsak nghal bawk a, Nilaini khan U.S. Immigration and Customs Enforcement chuan an man a ni.

Gouvea hi University of Sao Paulo Law School-a associate professor niin, kumin favang semester chhungin Harvard-ah hian zirtirna a pe mek a, hetiang thil a thlen tak avang hian U.S. chhuahsan a remti ta a ni, tiin Homeland Security Department chuan a tarlang.

Brookline, Massachusetts-a police-te chuan Juda-te ni thianghlim, Yom Kippur hman a nih hma lawkin temple Beth Zion bulah silai keng mi pakhat an hmu tih report an theh luh hnuah, October 1, 2025 khan Gouvea hi man a lo ni tawh a, pellet silai hmangin a chhehvela sazute a kap tih police report chuan a tarlang. Thla hmasa khan dan loa pellet silai a kawl avangin thiam loh chantir a ni a, thla ruk chhung pretrial probation-in dah a ni bawk.