Gaza-a Thailand mi ruang Israel hnenah hlan

Gaza-a firfiak pawlte chuan inkahhai thawhkhatna kalpuina peng pakhat atan, Thailand agriculture worker pakhat ruang chu Israel hnenah a hlan tih Israel leh Thailand official-te chuan nimin Ningani khan an sawi. Thailand mi ruang Israel kuta an hlan hi Sudthisak Rinthalak a ni a, inremna an siam hnuaia an mi man an hlan hnuhnung ber a ni.

Rinthalak hi agriculture worker a ni a, inbeihna thlen nasatna hmun Kibbutz Be'eri-a hnathawk tura rawih a ni. Israel official-te chuan Rinthalak, kum 42 hi October 7, 2023-a Hamas-in Israel a beih ṭumin a thi tih an sawi a, a ruang hi firfiak pawl Islamic Jihad-te chuan an la tih an sawi. Rinthalak-a hi May 16, 2024 khan a thi tih puan niin, a ruang hi Nilaini khan hlan a ni.

Thai Foreign Ministry thupuangtu, Nikorndej Balankura chuan Rinthalak chhungte pawh hriattir an ni tawh tih a sawi a, Thai mi Gaza-a an man 31 chhuah zalen an nih tawh chungchangah Israel sorkar hnenah lawmthu a sawi bawk. Mi mante zinga 28 chu nung dama chhuah an ni a, mi pathum an thi.

Thai mite hi ram pawn aṭanga man tam ber an ni a, Thai Foreign Ministry chuan inbeihna thlengah mi 46 an thi tawh tih a tarlang. Israel khua leh tui zingah police officer Ran Gvili ruang chu Gaza-in an la hlan loh la awm chhun a ni. Gvili hian October 7-a Nova music festival-a inbeihna thlengah mi eng emaw zat a chhan chhuak a ni. October 10-a inkahhai puan a nih aṭangin nungdamin mi 20 kir an ni tawh a, ruang 27 chu Israel hnenah hlan an ni tawh bawk. Israel pawhin Palestinian mi leh sa ruang za chuang Gaza-ah a hlan tawh bawk a, ruang ṭhenkhatte hi tunge an nih tih finfiah a la ni lo.