SKorea-ah home camera 120,000 chuang hack

South Korea police-te chuan Pathianni khan chenna in leh sumdawnna hmuna video camera an dah 120,000 hack-tua puh mi pali an man.

Home camera tia sawi hi IP camera a ni a, CCTV aia man tlawm deuh zawk niin, in leh sumdawnna hmunahte an hmang nasa hle. An hack-te hi mimal in, karaoke room, pilate studio leh gynaecologist clinic-a mite an ni. Video camera an hack aṭang hian mipat hmeichhiat lam rawng kai video siamin, ram pawn lama website-ah an hralh a ni.

South Korea National Police Agency chuan an mi man palite hi inthurual ni loin a hran ṭheuha che an ni tih a sawi. An zinga pakhat chuan camera 63,000 hack-in, heta ṭang hian video 545 a siam a, hei hi won mtd 35 (USD 12,235 ) in a hralh tih an tarlang. Mi dang pakhat hian camera 70,000 hack-in, video 648 chu won mtd 18 in a hralh bawk. Anni pahnih hi nikkuma IP camera hack aṭanga footage, website-a post zinga 62% velah mawhphurtu nia rin an ni bawk.

Cyber investigation chief, Park Woo-hyun chuan IP camera hack a, dan phal loha film lo lak chhuah chuan mi dang tawrhna nasa tak a thleng a, pawikhawihna lian tak a ni tih a sawi. Hetiang thil ti ṭhinte chu zawnchhuah zel an tum tih a sawi. Video an lak chhuah lo en leh, lo lei pawh pawikhawihna a ni tel tih sawiin, a leitute pawh chhui chhuah zel an tum thu a sawi.