Sri Lanka-ah tuilian leh leimin vanga thi 334 tling tawh

Sri Lanka ramah Cyclone Ditwah tleh hnua tuilian leh leimin nasa tak thleng vanga thi chu mi 334 an tling tawh tih disaster agency chuan a sawi a, chin hriat lohin mi eng emaw zat an awm bawk.

Disaster Management Centre (DMC) chuan ruahsur nasa avanga tuilian hian mi mtd 1.3 chuang a nghawng tih a sawi. Nimin lam khan ruahsur ziaawm ṭan mah se hmun hniam lamte chu tuiin a la chim nasa hle. Tuilenna hmun, Colombo hmar lama damdawi-ina damlo te ei tur pe tura tirh, Bell 212 helicopter chu Pathianni zan khan chesualin tuipuiah a tla. Vanneihthlak takin helicopter-a chuang mi pangate chu him taka chhanchhuah vek an ni tih Air Force thupuangtu chuan a sawi.

President Anura Kumara Dissanayake chuan Inrinni liam ta khan state of emergency a puang a, ram dangte puihna a dil nghal bawk. India chuan chhanchhuah hna thawhnaa puitu tur a tir tawh a, Pakistan leh Japan pawhin puih an tum thu an sawi tawh bawk.

Southeast Asia ramte pawhin thlipui tleh, ruahsur nasa avanga tuilian leh leimin thleng an tuar nasa hle bawk. Indonesia-a Sumatra thliarkara thlipui tleh leh tuilian vangathi mi 442 an tling a, chin hriat lohin mi 402 an awm bawk. Thailand-ah pawh thlipui tleh leh ruahsur nasain chhiatna a thlenah mi 170 an thi a, hliam 102 an awm. Malaysia-a tuilian vangin mi 18,700 sawn chhuah an ni bawk a ni.