Bangladesh court-in PM hlui kum 21 tang turin hrem

Bangladesh-a Dhaka Special Court chuan nimin khan an ram prime minister paihthlak tak, Sheikh Hasina chu sorkar project hmanga ram neih kaihhnawiha eiruk thubuai pathum siamsakah thiam loh a chantir a, kum 21 tang turin a hrem.

Sheikh Hasina hi thla tir lam khan a kaihhruai sorkar laka lungawi lohna lantirte security force hmanga beih let tira puhnaa thi turin court-in a chungthu a lo relsak tawh bawk. Nikum August thla khan India ramah a tlanchhia a, a la awm chhunzawm reng a ni.

Hasina hi thuneihna a chan laia Purbachal New Town project siamna tura amah leh a chhungte tan dik lo taka ram neiha puh a ni. Hemi kaihhnawihah Anti-corruption Commission-in thubuai pathum a siamsakah kum sarih ṭheuh tang tura hrem a ni. A fapa Sajeed Wazed leh a fanu, Saima Wazed te pawh kum nga ve ve tang tura hrem an ni bawk.

Court-in a chungthu a rel dan hi an pawm lo tih Hasina leh a party, Awami League chuan an sawi. A thubuai ngaihtuah lai hian Hasina hian defence lawyer pawh a nei lo a, hei vang hian Hasina laka rorel dan chu felhlel nia an ngaih thu human rights group-te pawhin an sawi.