Pakistan paramilitary headquarters bei

Pakistan hmar thlanglam, Khyber Pakhtunkhaw province khawpui, Peshawar-a paramilitary force, Federal Constabulary headquarters chu nimin khan thihchilh bomb hmanga beih a ni a, mi pathum an thi.

Peshawar police hotu, Mian Saeed Ahmad chuan FC headquarters beitu zinga pakhat hian gate pui ber bulah thihchilh bomb a tipuak a, hemi hnu hian a thurualpui pahnihte chu compound chhungah an lut a, silai an hmetpuak zui tih a sawi. Sipaite hian lo kap let ve nghalin, an headquarters beitu zinga pahnih chu an kaphlum bawk a ni.

FC headquarters hi khawpui chhung hmun lun lai taka awm a ni. Pawikhawihna thlen lai hian compound chhungah morning parade drill neiin sipai eng emaw zat an awm a ni. Headquarters beitute hian parade neihna hmun hi luhchilh a, beih an tum a, mahse, sipaiten an lo dang thei niin Ahmad chuan a sawi. Inkahna thlengah hian civil mi paruk an hliam tel a, Lady Reading Hospital-ah hruai nghal niin, an ngaihtuahawm lo nia sawi a ni.

Nimina pawikhawihna thleng hi eng pawl mahin an tih niin an la chhal lo. Hetih lai hian Pakistan Taliban, Tehrik-e-Taliban Pakistan chu puh an nih thung.