Bangladesh-in Sheikh Hasina thawn haw turin India ngen

Bangladesh-a International Crimes Tribunal in an ram prime minister hlui, India rama tlanchhe mek, Sheikh Hasina thi tura hremna a pek hnuah, Bangladesh sorkar lailawk chuan India Ministry of External Affairs hnenah Hasina chu an rama thawn haw tura ngenna lehkha a thawn.

Foreign affairs adviser, Touhid Hossein chuan India sorkar hnenah ngenna an thawn thu hi Pathianni khan a sawi. An lehkha thawnah hian kum 2024 July-August a nawrh huaihawtte sorkar thupeka beih let an nihnaa Hasina inhnamhhnawih dan leh, court-in a chunga ro a rel dante kimchang taka tarlan a ni tih a sawi.

International Crimes Tribunal-in November 17-a Hasina thi tura a chungthu a rel sak hnuah, Hasina thawn haw tura India an ngen hi rin lawk a lo ni tawh a ni. India leh Bangladesh in thiam loh chantirte thawn haw tura inremna an lo siam tawh angin, India pawhin tikhawtlai loa Hasina chu Bangladesh-a a thawn kir thuai an beisei thu leh, hei hi a mawhphurhna a nih tel thu Hossein chuan a sawi a ni.