Malaysia-in kum 16 hnuai lam tan social media khap a tum

Malaysia sorkar chuan kum 2026-ah an ramah kum 16 hnuai lam tan social media hman khapna siam a tum tih a sawi. Online platform chu naupang tan a him tawk lo nia sawiin, ram ṭhenkhat chuan kum 16 hnuai lam tana hman khap leh khuahkhirhnate an lo siam tawh a ni.

Communication minister Fahmi Fadzil chuan sorkar chuan Australia leh ram dang ṭhenkhatin social media hmang tura kum bithliah leh khuahkhirhna an siam dante a zirchiang a, an ramah pawh cyberbulling, sum hmanga inbumna leh mipat hmeichhiat lam hawia inrikrapna awmte laka naupangte venna siam hi ṭul a ti a ni, a ti. France, Spain, Italy, Denmark leh Greece te pawhin age verification siamna tur template an enchhin mek bawk.

Minister chuan kum tharah kum 16 hnuai lamten social media hrang hrangah account an hawn khapna hi siam a ni dawn a, hei hi social media platform hrag hrang pawhin an zawm a ngai dawn tih a sawi. Malaysia-a platform leh messaging service, hmangtu mtd 8 chin neite chu nakkum January aṭanga hman tur dan thar siam naah license an neih vek a ngai tawh ang.

Khawvel pumah social media-in naupangte hriselna leh himna a nghawng dan chungchang hian buaipui a hlawh tawh hle. Tiktok, Snapchat, Google bakah Facebook, Instagram, leh Whatsapp operator Meta platform-te chuan naupang rilruah nghawng ṭha lo a nei nia puhna thubuai pawh an hmachhawn fo a ni.