Hamas-in ruang 28 zinga 25 Israel hnenah hlan tawh

Israel leh Hamas-in Gaza Strip-a inkahhai puanna atana inremna an lo siam tawh angin, Hamas chuan October 7, 2023-a Israel an beih ṭuma an mi man, Gaza-a an hren zui nungdama awmte a chhuah vek hnuah thi tawhte ruang pawh a hlan chhunzawm zel. Ningani khan ruang pakhat hlan lehin, ruang hlan tur 28 zinga 25 chu a hlan tawh a ni.

Ningania Hamas-in ruang an hlan hi Israel chuan a endik hnuah, kum 73 mi Mery Godard ruang a ni tih a sawi a, October 7-a Hamas hoin an thah tih a tarlang. Godard ruang hi Gaza chhim lam, Khan Younis area-ah hmuh a nih thu Hamas leh Palestinian Islamic Jihad chuan an sawi a, Red Cross hnenah pein anni hian Israel sipaite hnenah an hlan chhawng leh.

Israel Prime Minister office chuan Ningania ruang hlan, Godard hi October 7, 2023 khan Hamas-ten Be'er an beihnaah a nupui , Ayelet nen an that tih a tarlang. Hamas hian Israel chhim lam an beih ṭum hian mi 1,200 an thah bakah, mi 251 manin Gaza-ah an hreng zui a ni. He pawikhawina thleng chhang let a, Israel-in Gaza Strip-a beihpui a thlaknaa Palestinian thi hi 69,000 chuang an tling tawh niin Hamas sorkara health ministry chuan a tarlang ve bawk.

Hamas-in ruang an la hlan loh pathum zinga pahnih hi Israel mi niin, Thailand mi pakhat a tel bawk. Israel chuan Hamas hi ruang zawn hna tikhawtlai luiah a puh a, mahse, Hamas chuan indona avanga Gaza-a in leh lo tam tak tihchhiat a nih avangin zawn chhuah a harsa tawh niin an sawi ve thung.