TB vangin kum 2024-ah mi mtd 1.23 thi

UN health agency, World Health Organisation (WHO) chuan kum 2024-ah khawvel pumah Tuberculosis, TB natna vangin mi mtd 1.23 an thi tih a sawi. TB vanga thi hi a kum hmasa aiin 3% in a tlahniam a ni.

WHO chuan Nilaini khan annual TB report tichhuakin, kum 2023 aṭang khan TB vei zat hi 2% velin an tlahniam tih a tarlang. Covid-19 hripui len hnuah TB vei zat leh thihpui zat an tlakhniam ṭum khatna a ni.

Kum 2024-ah mi mtd 8.3 chu TB treatment pek an ni a, enkawl dam hi 68% aṭang 71% ah a kaisang bawk. TB enkawlna kawnga hmasawnna awm mek chu, fund dawn a tlem tak avangin a tlahniam leh thei tih WHO hotu Tedros Adhanom Ghebreyesus chuan a sawi. Nikuma TB vanga thi zat hi kum 2015-ami aiin 29% in a tlem tawh a, WHO chuan kumina TB vanga thihna thleng hi 75% a tihhniam theih leh, kum 2030-ah 90% a tihhniam theih a beisei.