Pakistan Parliament-in ram danpui siamṭhatna bill pass

Pakistan parliament chuan an ram danpui siamṭhatna, l 27th Constitutional Amendment Bill chu Nilaini khan a pass. Danpui siamṭhatna turah hian Chief of Defence Forces post siamtharna leh, constitutional court dinna turte telh a ni.

Bill hi Parliament upper house, Senate-in a pawm hnuah, Thawhlehni khan law minister Azam Nazeer Tarar chuan lower house, National Assembly-ah a pu lut a ni. Sawi ho a nih hnuah eptute boycott-na karah Nilaini khan an pass ta a ni. Vote lak hma hian jail-a tang mek, prime minister hlui Imran Khan-a party, Pakistan Tehreek-e-Insaf member-te chu a copy pawtthlerin PM chair lamah an vawm. National Assembly speaker Ayaz Sadiq chuan bill thlawp lamah vote 234 tlain, a duh lo lamah vote li a tla tih a sawi.

Nilainia Naitohal Assembly-a bill sawi honaah hian prime minister Shehbaz Sharif, Pakistan Muslim League-Nawaz (PML-N) chief Nawaz Sharif leh Pakistan People's Party chairman Bilawal Bhutto-Zardari te pawh an tel.

Parliament in hnihah pass a nih tak avangin president Asif Ali Zardari pawmpuina chauh mamawh a ni tawh. Bill siamṭhatah hian President chuan Prime Minister thurawnna hnuaiah Army Chief leh Chief of Defence Force a ruat dawn a, Joint Chiefs of Staff Committee chairman post chu November 27, 2025-ah tihtawp rawt a ni bawk.

Chief of Army Staff chu Chief of Defence Forces a ni bawk ang a, Prime Minister nen inrawnin National Strategic Command hotu tur chu Pakistan Army aṭangin a ruat ang. Sorkar chuan armed forces-a mite chu Field Marshal, Marshal of the Air Force and Admiral of the Fleet rank thlengin a kaisantir dawn bawk a ni. President in a pawmpui hunah, army chief Asim Munir chu Chief of Defence Force a ni nghal dawn a, a term a zawh hunah a rank pangngaiah awm lehin, a dam chhung zawng dan hmangin thubuai siamsak theih loh tura hum a ni bawk ang.