Kumin hi khawvela kum lum ber dawttu a ni mai thei

World Meteorological Organisation (WMO) chuan kumin hi khawvela kum lum ber dawttu emaw a pathumna emaw  a ni mai thei tih Thawhlehni khan an sawi.

State of Global Climate 2019 summit an neih mekah WMO chuan kumin January aṭanga October thleng khan Global mean temperature chu pre-industrial level chungah 1.1 degress celsius (error margin of 0.1 degree) a nih thu sawiin, chhin­chhiah tawh chinah khaw­vela kum lum ber dawttu a nih loh chuan a pathumna emaw a ni mai thei tih an sawi a ni. 

"Kum nga kal ta kha chin­chhiah tawh chinah kum nga lum ber a ni tih a chiang deuhthaw tawh a, kum 10 kal ta, 2010-2019 inkar hi kum 10 lum ber (warmest decade) a ni dawn a ni. 1850 atang khan kum 10 indawt zel chhinchhiah chu a lum belhchhah zel tawh a ni," tiin an sawi.

World Meteorological Orga­nisation secretary general Petteri Taalas chuan kumin, kum nga chhung leh kum 10 kal ta report hi kum a la tawp loh avangin rinlawkna chiah a la ni tih sawiin, thil danglam erawh a awm a rin loh thu a sawi. An chhinchhiah tawh chinah chuan kum 2016 kha khawvel lum ber kum a ni.

WMO thuchhuah siam hi Madrid a neih mek 2019 United Nations Framework Convention on Climate Change (COP25) ni hnihnaah tarlan niin, he hunah hian ram hrang hrang 200 dawn aṭangin sik leh sa inthlak zel chungchang sawiho turin mi pawimawh tak tak an kal khawm a ni.