Ecuador tan-ina intihbuaina thlengah mi 31 an thi

Ecuador chhim thlang lam, El Oro province-a Machala khuaa tan-inah Pathianni khan intihbuaina nasa tak a thleng a, tang zinga mi 31 an thi.

Prison agency, SNAI chuan an ram huna Pathianni zing dar 3 velah buaina hi a chhuak niin a tarlang. Tang intibuaite hian silai leh puak thei thil dangte an hmang a ni. Thuneitute chuan buaina chhuah chhan leh, buaina chhuaka thite hming leh nihna an la puangzar lo.

Ecuador hi prison system ṭha lo leh, tan-in chhunga buaina chhuah ngunna ram zingah a tel. Tan-inah a awm thei tura bituk aia tam dah an ni a, tan-in enkawlna kawngah eirukna a nasat avang leh, sorkar lam aṭanga hma lakna a chak tawk loh avangin buaina an tawk fo a ni. Tang zingah Colombia leh Mexico-a ruihhlo tawlhrutu pawl lian nena inzawmna nei tam tak an awm ṭhin a, heng pawlte hi an intibuai fo a ni.

Kum 2021 aṭang khan tan-in chhung thuneihna inchuha intihbuaina thlengah tang 500 chuang an thi tawh.Kumin September thla khan Pathiannia buaina chhuahna tho, Machala tan-inah hian pawl pahnih inkara buaina chhuak vangin mi 14 an lo thi tawh a, a hnu lawkah Esmeraldas khaw hmar lama tan-ina buaina chhuakah mi 17an thi bawk.