Portugal-ah labour law siamṭhat tumna duh loin kawng zawh

Portugal-a centre right sorkarin labour siamṭhat a tum duh loin, Inrinni khan an ram khawpui, Lisbon-ah mi tam takin kawng an zawh. Sorkarin labour law siamṭhat a tum danah worker-te dikna chanvo ngaihthah sak a ni tih sawiin, hlawh sang zawk an phut bawk.

Nawrh huaihawt hi Portugal-a pawl lian ber, CGTP in a buatsaih niin, sorkar chu hnathawktu hlawh tlem zawkte ngaihsak lo leh, sumdawng liante duhsakah an puh a ni. CGTP chuan nawrh huaihawtnaah hian mi nuai khat vel an tel niin an sawi a, police lam erawh chuan pungkhawm zat hi an sawilang lo thung.

September thla khan prime minister Luis Montenegro kaihhruai sorkar chuan labour law siamṭhatna tur draft bill hi a lo pawm tawh a ni. Dan siamṭhat an tumah hnathawktute chu a chhawrtuten awlsam zawka an ban theih dan turte a sawi a ni. Pawn lama hna thawh tur pek, outsourcing pawh awlsam zawka kalpui theih a ni dawn a, hei bakah hnathawkte chuan ni khatah extra-in darkar hnih thleng an thawk thei dawn bawk. He bill far-right Chega lamin an thlawp ve bawk avangin Parliament-ah pawh pass ngei a nih rin a ni.

Portugal hi Europe khawthlang ram zingah ram rethei zinga mi niin, official data-a a lan danin, hnathawktu 50% aia tam mah chuan thla khatah euro 1,000 (USD 1,166) aia tlem an hlawh a ni. Minimum wage hi euro 870 niin, Europe ram zingah a hniam ber pawl a ni.