Brazil-ah UN climate summit ṭan

Brazil ramah nimin aṭang khan Conference of Parties, COP30 U.N. Climate Summit neih ṭan a ni a, November 21 thleng a awh ang.

Summit hi Para state-a Belem-ah neih a ni a, ram hrang hrang hruaitute bakah scientist, NGO leh civil society aiawhte an tel a, khawvel sik leh sa inthlak danglam chak zel venna kawnga hma lak dan turte sawi ho a ni ang. Khawvel boruak, temperature lum belhna 1.5 degree Celsius china ven theih dan turte thlurbing a nih bakah, new national action plan (NDCs) chungchang leh COP29-a sum pek tura an intiamnaa hma an lak zui dangte ngaihtuah ho a ni bawk ang.

Climate summit hi Amazon basin-a a thlen vawi khatna a ni a, mi mtd 1.4 chenna Belem khawpuiah hian summit chhimtu hi mi 50,000 dawn an tling rin a ni. Nimina summit ṭan a nih thleng khan ram hruaitu 60 velin an tel tur thu an tichiang tawh a, hetih lai hian nikuma COP29, Azerbaijan ramah neihah khan ram hruaitu 80 telin, kum 2023-a Dubai, UAE-a neihah khan ram hruaitu 165 an tel bawk.