Philippines-ah state of emergency puang

Philippines ramah typhoon Kalmaegi tleh leh tuilianin chhiatna a thlena thi chu mi 241 an tling tawh. Chhiatna nasa tak thleng vang hian nimin khan president Ferdinand Marcos Jr. chuan state of emergency a puang.

Thlipui tleh hi Cebu province-in a tuar na ber a, thi zinga a tam zawk hi he province-a mi an nih bakah chin hriat lohin mi 127 an la awm mek bawk. Typhoon Kalmeagi tleh hian mi mtd 2 dawn a nghawng a, mi nuai 5.6 velin in leh lo an chhuahsan a ngai a, emergency shelter-ah mi nuai 4.5 dawn an awm a ni.

President Marco chuan thlipui tleh hnua official-te nena meeting an neih hnuah state of emergency hi a puang a ni. Hemi hmang hian thlipui leh tuilian tuarte ṭanpui leh chhawmdawlna tur, emergency fund pawh rang zawka pek chhuah a ni thei ang. Typhoon Kalmaegi in chhiatna nasa tak a thlen hnuah, kar tawpah Philippines ramah hian thlipui dang, Uwan a tleh leh dawn nia sawi a ni. Kuminah Philippines ram hi thlipuiin ṭum 20 a nuai tawh a ni. Typhoon Kalmaegi hi vawiin hian Vietnam ram laili lamah a tleh rin a ni.