US in nuclear test a neih chuan Russia-in hma lak ve nghal a tum

Russia president Vladimir Putin chuan US emaw, Comprehensive Nuclear-Test-Ban Treaty (CTBT) a tel ramten nuclear ralthuam an enchhin a nih chuan, Russia pawhin hma a lak ve nghal tur thu a sawi. Official-te chu nuclear ralthuam enchhinna tur a ṭul anga lo duang lawk turin a hrilh bawk.

US president Donald Trump chuan October 30 khan Department of Defense hnenah hun rei tak an lo chawlhsan tawh, nuclear ralthuam enchhinna chu kalpui leh tura thu a pek thu a sawi. Hei hi nuclear ralthuam nei ramten an enchhin reng avangin tih ve a ngai niin a tarlang.

Russia President chuan Nilaini khan Foreign Ministry, Defence Ministry, special service bakah civilian agency-te chu information lakhawm a, Security Council zirchian tir tur leh, nuclear ralthuam test-na tura inbuatsaih dan tura rawtna an neihte theh lut turin a ti. Russia hian kum 1991-a Soviet Union a kehdarh hnu khan nuclear ralthuam hi a enchhin zui leh tawh lo. Putin-a'n hriattirna a tihchhuah hnuah hian defence minister Andrei Belousov chuan Novaya Zemlya-a Arctic testing site chu nuclear test-na atana hman theih a nih thu a sawi.

US hi khawvela nuclear ralthuam ngah ber ram niin Russia hian a dawt a ni. Center for Arms Control and Non-Proliferation (CACNP) in a chhut danin US hian nuclear warhead 5,550 vel neiin Russia hian 5,459 a nei. China pawhin tun hnaiah a nei ngah chak hle a, kum 2023 aṭang khan kum khatah 100 vel zet a neih belh a, 600 vel a nei tling tawh niin an chhut bawk.