Hamas-in Israel hnenah ruang 2 hlan leh

Palestinian firfiak pawl, Hamas chuan Israel nena inremna an lo siam tawh angin, Ningani khan Gaza Strip-a Israel mi an hren, thi tawh ruang pahnih chu Israel hnenah a hlan leh. Israel mi ruang hlan kim loh 11 a la nei.

Gaza Strip-a inkahhai puanna tura Israel leh Hamas-ten inremna an siamah, Hamas hi October 7, 2023-a Israel an beih ṭuma an mi man, nungdama la awmte chhuah vek tur leh, an mi man thi tawh ruang pawh Israel hnena hlan vek tura tih an ni. Nungdama awmte chu an chhuah kim tawh a, mahse, ruang hlan tur zingah 11 a la hlan kim thei lo. Ruang ṭhenkhat hi an awmna hriat a nih tawh loh avangin an zawn chawp a ngai a, hei vang hian hun a duh rei dawn niin an sawi. Hetih lai hian Israel lam chuan hlan kim thuai turin a nawr ve reng thung.

Ningania Hamas-in ruang pahnih an hlan hi enfiah a nih hnuah Amiram Cooper (84) leh Sahar Baruch (25) te ruang a nih thu Israel chuan a sawi. Cooper hi October 7, 2023 khan Hamas hian Kibbutza Nir Oz-a a chenna in aṭangin an man a, nikum June thla khan Israel Defence Force (IDF) chuan thah a ni tawh tih an sawi. Ben-Gurion University engineering zirlai, Barch hi Kibbutz Be'eri aṭanga man a ni a, kum 2023 December thlaa IDF-ten Hamas mi man chhanchhuah tuma beihpui an thlak, an hlawhtlin theih tak loh ṭum khan Hamas ten an that nia sawi a ni bawk.