SKorea-in Trump hnenah an ram chawimawina sang hlan

South Korea chuan nimin khan an ram tlawhtu, US president Donald Trump chu an ramin civil mi chawimawina a pek san theih ber,"Grand Order of Mugunghwa" a hlan.

President Trump hian Asia tlawhin a zin kual mek a, Malaysia leh Japan a tlawh hnuah nimin khan South Korea a thleng a ni. South Korea president Lee Jae Myung nen ram pahnihte insumdawn tawnna leh defence lama thawhdunna chungchang an sawi dun nghal a ni. Hruiatu pahnihte hian thla hnih chhunga meeting an neih vawi hnihna niin, July thla khan SKorea-in US-a investment USD tld 350 hu siam a tiam hnuah US hian SKorea bungrua chawk luha chhiah lak chu 15% a tihhniam a remti a ni.

Trump hian vawiina Gyeongju khawpuia Asia-Pacific Economic Cooperation (APEC) summit kar lakah China president Xi Jinping a hmu dawn bawk. Ram pahnihten trade war an neih mek chinfel a, chhiah lak dan tur chungchangah pawh inremna siam theih dan turte an sawi dun rin a ni.

North Korea chuan Trump-a'n South Korea a thlen hnu lawkah an ram khawthlang lam tuipui kam aṭangin sea-to-surface cruise missile hlawhtling takin an kap chhuak tih a sawi ve bawk. An missile enchhin hi darkar hnih chuang a thlawh hnuah a target a fuh tih an sawi. NKorea hian kar liam ta khan short-range ballistic missile a lo enchhin tawh bawk.