New Zealand : Tleirawl tana social media khuahkhirh chungchang sawi ho dawn

New Zealand Parliament-ah tleirawl, kum 16 hnuai lam tana social media khuahkhirhna siamna tur bill lut sawi ho a ni dawn. He bill hi social media-in tleirawltea nghawng ṭha lo a nei tur venna atana tih a ni.

Kumin May thla khan rorellai, National Party member Catherine Wedd chuan bill hi a lo theh lut tawh a, National Party member-te chuan an thlawp vek laiin an thawhpui party dangte chuan an thlawp dawn leh dawn loh an la sawichiang lo.

Bill-ah hian social media platform hrang hrangte chuan an platform hmangtute kum zat finfiahna nei ṭhin turin a phut a ni. Australia chuan kum 2024 khan tleirawlte tana social media hman khap leh khuahkhirhna dan a lo pass tawh a ni.

New Zealand parliamentary committee chuan social media-in kum naupang zawkah nghawng ṭha lo a neih dan leh, hemi venna atana sorkar, sumdawng, leh khawtlangin mawhphurhna an neihte pawh a lo zirchiang tawh a ni. Report hi nakkum kum tir lamah tihchhuah an tum. Prime minister Christopher Luxon chuan tleirawlten social media an hman nasat lutuk chuan an rilru hriselna lam thlenga a nghawng pawi theih dante chu ngaihven a, hma lak vat a ngaih thu a lo sawi tawh bawk.

Hetih lai hian civil-liberties organisatin, PILLAR chuan bill hian naupangte online tur a ven phah dawn a, privacy palzutna leh New Zealand mipuiin online tura zalenna an neih khuahkhirhna a ni zawk dawn tih a sawi thung.