ICJ-in UN agency-te thawhpui turin Israel a hriattir

The Hague, Netherlands-a United Nations court, International Court of Justice (ICJ) chuan Israel chu Gaza Strip-a chhawmdawlna a luh phalsakin, UN institution-te a thawhpuiin a thlawp tur a ni, a ti. Thawhpui tura a tih zingah hian United Nations Relief and Works Agency (UNRWA) pawh a tel. Gaza Strip-a inkahhai puan tawh hnuah chhawmdawlna thawn luh a khap chu international law bawhchhiatna a ni tiin a sawi bawk.

UNRWA hian Palestinian raltlante chhawmdawl hna a thawk a, Gaza Strip-ah pawh an thawk tel a ni. Mahse, kum 2023 October 7-a Hamas firfiakten Israel an beih ṭum khan pawikhawihna thlentu zingah UNRWA staff ṭhenkhat an tel tih sawiin, Israel chuan an ram leh an ram luah chhunga hna an thawh a khap zui a ni.

Judge 11 awmna, ICJ panel chuan Israel hian UN-in Gaza-a mipui chhawmdawl hna a thawhna chu a thlawp tur a ni tiin, UNRWA staff-te Hamas tan an thawk nia a puhnaah finfiahna a nei lo tih a sawi. UNRWA hian dan bawhchhiat a neih loh avangin Gaza-a chhawmdawl hna an thawh chu chhunzawm tir a ni tur a ni, a ti bawk.

Hetih lai hian Israel chuan ICJ in a puhna hi a hnawl thung a, UN hnenah pawh UNRWA-a Hamas inrawlh thuk dan finfiahna an pe vek tih a sawi. ICJ chuan firfiaka chetnaa UNRWA inrawlh an duh loh thu an auchhuahpui zawk tur a ni tiin, October 7 hma leh a hnu thlengin UNRWA-ah hian Hamas an tel reng a ni, a ti.