Madagascar President thar atan sipai hotu Randrianirina la lut

Madagascar sipaiten an ram thuneihna an ram president paihthlak tak, Andry Rajoelina lak aṭanga a laksak hnuah, nimin khan sipai hotu, colonel Michael Randrianirina chu President thar atan lak luh a ni.

Kar eng emaw chen liam ta aṭang khan an ram khawpui, Antananarivo-ah tui leh electric supply ṭha lo lutuk avangin nawrh huaihawt a ni a, hemi hnu hian Andry Rajoelina kaihhruai sorkar laka lungawi lohna pawh lantir chhunzawm a ni. Nawrh huaihawtnaa innawr buaina thlengah mi 22 an thi a, mi 100 chuang an hliam. Military elite unit, CAPSAT in an thlawp tak avangin Rajoelina hi ram pawnah a tlanchhe zui a, sipaiten thuneihna hi chelhin High Constitutional Court chuan president thar atan Col Randrianirina hi a ruat nghal bawk.

President thar atana lak luh, kum 51 mi Col Randrianirina chuan an ram inthlanpui chu thla 18-24 chhungin buatsaih a tiam a, an pawm tlan theih tur prime minister thar pawh ruat a ni dawn tih a sawi bawk. Sipai sorkar din chu an duhdan a ni lo tih sawiin, sorkar chu civil mite ta a ni tiin, presidential council-ah chuan sipai bakah civil mite pawh dah tel an nih thu a sawi. President thar lak luhnaah hian US, EU leh France ambassador an tel.

Madagascar hi khawvela ram rethei ber zingah a tel a, a ram mipui mi mtd 32 zingah 80% vel chu mi rethei, ei leh in tur hnianghnar nei pha lo an ni tih World Bank chuan a lo tarlang tawh.