Afghanistan leh Pakistan-in darkar 48 chhung inkahhai puang

Afghanistan leh Pakistan chuan an sipaite ramria nasa taka an inkah hnuah, Nilaini zan khan darkar 48 chhung atan inkahhai an puang. Ramria inkahna thlengah hian civil mi eng emaw zat an thi a ni.

Inkahhai hi Pakistan huna Nilaini zan dar 6 aṭang khan hman ṭan a ni a, ram pahnihte hian inkahhai puan ngentuah an inpuh tawn a ni. Inkahhai puan chhung hian inremna zawnga inbiakna neih an tum tih an sawi bawk.

Afghanistan-a rorellai, Talian sorkar chuan inremna an siam chu Pakistan-in a bawhchhia a nih loh chuan ṭha taka awm turin a sipaite a chah. Pakistan lam pawhin inremna hi bawhchhe lo turin Afghanistan an vaukhan bawk a ni. Inkahhai puang mah se, ramria inkalpawhna hmun pawimawhte erawh khar chhunzawm a ni thung.

Ram pahnihte hi kar khat dawn ramriah an inbei tawh a, inremna an siam hma Nilaini pawh khan Afghan Taliban fighter-te chuan border post pahnih an kap a ni. Pakistan sipaiten lo bei letin Taliban fighter 20 an kap hlum niin an sawi.

Ramria inbeihna thleng vang hian an ram civil mi 15 bakah fighter pathum an thi niin Taliban chuan a sawi a, civil mi hliam 100 chuang an awm bawk tih a tarlang. Pakistan lam hian civil mi thi zat a sawilang lo a, sipai 23 an thih thu erawh a lo sawi tawh bawk.