SKorea-in Cambodio hmun ṭhenkhata zin a khap

South Korea sorkar chuan, Cambodia-a hmun leh khawpui ṭhenkhatah an ram mi leh sate zin a khap.

Foreign Ministry chuan hemi chungchangah hian nimin khan thuchhuah a siam a, Kampot province-a Bokor Mountain area bakah Bavet City leh Poipet City-te chu SKorea mite tana tlawh khap a ni tih a tarlang. Heng an hmun sawi tlawh lui emaw, awm lui emaw chu pawisa chawitir an ni dawn tih sawiin, zin tumte pawh ṭhulh turin a ti.

Khapna tihchhuah a nih hma hian sorkar chuan Cambodia rama inbumna kalpuina hmunah SKorea mi 1,000 vel an thawk mek nia hriat a nih thu leh, heng hmun aṭang hian South Korea mi an bitum ṭhin thu a sawi. National security adviser, Wi Sung-lac chuan, "Cambodia-a scam industry-ah ram hrang hrang mi nuai hnih vel an thawk mek nia hriat a ni. Heng mite hi khawvel hmun hrang hrang, South Korea pawh huamin mi bum tur an zawng ṭhin a ni," a ti. South Korea mi, scam operation kalpuinaa tel mi 63 chu Cambodia thuneituten an man tawh a, an ramah hruai haw tuma hma an lak mek thu a sawi bawk. Hruai haw an nih hnuah thubuai siamsak an ni dawn tih a tarlang.

Hetih lai hian scam industry-ah hian mahni duh thua thawk an awm laiin, bum chhuaha thawh luih tir eng emaw zat an awm bawk tih SKorea foreign ministry chuan a sawi. Mi bum ṭhinte hian August thla khan SKorea mi, college zirlai pakhat chu ru boin an that a ni. Kumin January -August chhung khan bum chhuah leh hna thawh luih tir nia hriat, an chin hriat loh hi mi 330 an awm. Heng mite zawn chhuah leh, college zirlai thahnaa inhnamhnawihte dap chhuak turin Cambodia thuneitute pawh thawhpui an tum tih Presidential Office chuan a sawi. Nilaini khan vice foreign minister kaihhruai South Korean team chuan Cambodia hi an pan tawh.

Cambodia ramah hian hna ṭha zawk pek tiamin Korea mi tam tak bum luh an nih thu SKorea chuan a sawi. Rights group Amnesty International pawhin Cambodia rama scam operation a hluar hle tih sawiin, inbumna kalpuina atana hman hmun 53 vel a awm a ni, a ti.