Peru Congress-in an ram President ban

Peru Congress chuan an ram president aṭangin Dina Boluarte an paihthla a, an paihthlak aṭanga darkar khat tling loah Congress leader Jose Jeri chu president lailawk atan lak luh nghal a ni.

Dino Boluarte hi thamna laa puh a nih bakah a president hnua an rama pawikhawihna thleng hluar avangin sorkar laka lungawi lohna lantir a ni fo bawk. Ningani khan an ram khawpui, Lima-a concert neihna hmunah silaia inkahna a thleng leh bawkin hei hian mipui lungawi lohna a tizual hle. Kumin July thlaa a hlawh, Peru ram minimum wage aia a let 35 dawna a tihsan avangin sawisel pawh a lo tawk nasa tawh hle bawk a ni. Roreltute chuan Boluarte hi an ram kaihruai thei loah ngaiin, president a nihna aṭanga paihthlakna tur motion pali chu Congres-ah put luh a ni. Ningani zan khan Congress-ah a chungchang hi ngaihtuahin vote lak a ni a, mahse, Dino hi a tel ve lo. Vote lakah president aṭanga paihthlak duhtu lamah member 130 zinga 122 in an vote a, paihthlak a ni ta a ni. Paihthlak duhtu zingah hian a hmaa lo thlawp tawhtu, conservative party-te pawh an tel.

Boluarte hian amah thlaktu tur vice president a neih loh avangin paihthlak a nih hnu rei loteah Congress leader, Jose Jeri chu president lailawk atan lak luh nghal a ni. Kum 2022 December thlaa president aṭanga Castillo paihthlak a nih hnuah a vice president, Boluarte hi president-ah dah a ni a, hmeichhia zinga Peru president ni thei hmasa ber a ni.