Mt Everest-ah vur sur nasa vangin mi 1,000 dawn tangkhang

Khawvela tlang sang ber, Mt Everest-ah kar liam ta Zirtawpni aṭang khan vur thli a tleh a, vur leh ruah a sur nasat avangin Tibet lam aṭanga tlang lawn tura kal mi 1,000 dawn an tangkhang. Tangkhangte chhanchhuah hna hi thawh nghal a ni a, a tam zawk chu hmun him lamah hruai an ni tawh. Nimin thleng khan mi 200 chuang chu an la tang a ni.

Tun ang hunah Mt Everest-ah hian vur hi a sur fo a, mahse, tun ṭumah hian kum dang aiin a nasa zawk niin guide-te chuan an sawi. Hei bakah October thlaa thleng ngai vak lo, thli na tak a tleh tel tih an sawi bawk. Vur tla hian kawngpuite pawh a hnawh a ni.

China holiday a nih chhoh avangin Mt Everest hi a khawchhak lam, Tibet ram aṭanga lawn an tam zual nia sawi a ni. Mahse vur a sur nasat tak avangin Inrinni zan aṭang khan Tibet lam aṭanga lawn turte tan ticket pek chhuah chu tihtawp a ni rih.