France PM thar a bang leh nghal

France prime minister thar, Sebastien Lecornu chu PM atana ruat a nih aṭanga thla khat hnu lek, Pathianni khan a bang leh nghal.

President Emmanuel Macron-a'n PM atana a ruat, Lecornu hian a cabinet member turte puanzar an nih hnuah banna hi a theh lut a ni. Lecornu hian politcal party hrang hrangte a biakrawn hnuah, a cabinet member tur hi ruatin nimin khan meeting nei nghal tura ruahman a ni. Mahse, Pathiannia a cabinet member-te a puanah, sorkar hmasa cabinet member tam zawk dah chhunzawm an nih avangin eptu party bakah amah thlawptu lam telin sawisel a tawk zui a ni. Hei vang hian cabinet meeting pawh an neih hmain banna hi President hnenah a theh lut a, pawmsak a ni nghal bawk.

Lecony hi kum hnih pawh tling lo chhunga France PM pangana a ni. France sorkar hian inrenchemna kalpuina tura budget tihtlem tum chungchangah harsatna a tawk a, Lecornu hma hian Francois Bayrou leh Michel Barnier-te chu sorkar sum hman tur tihtlem an tum chungchang member-ten pawmpui thei loin prime minister aṭangin paihthlak an lo ni ve ve tawh a ni.

Far-right National Rally party chuan President chu PM thar ruat tawh lo a, inthlanpui buatsaih thuai zawk turin an phut. Inthlan buatsaih laia PM thar ruat leh ngawt chuan an ram chu dinhmun ngelnghetah a awm tir thei dawn lo tiin National Rally hruaitu Jorand Bardella chuan a sawi.