Russia-in Ukraine drone 251 kap thla

Russia Defence Ministry chuan Pathianni zan khan Ukraine-in an ram beihna tura a kah chhuah, drone 251 an lo kap thla tih a sawi.

Drone 40 chu kum 2014 aṭanga Ukraine an luah, Crimea bialah kah thlak a ni a, Black Sea chungah 62 kah thlak a ni bawk tih Ministry thuchhuah chuan a tarlang. Kursk leh Begorod bialah eng emaw zat an kap thla bawk. Pathianni zana mi hi kum 2022 February thlaa Russia-in an ram a run hnua beih letna tura Ukraine-in ṭum khata drone a kah chhuah tam ber zinga mi a ni.

Belgorod biala power infrastructure chu Ukraine-in an kah chhiat avangin nimin zing thleng khan municipal area 24-a mi sing tel chuan power supply an nei lo niin governor Vyacheslav Gladkov chuan a sawi.

Ukraine chuan Russia-in drone hmanga an ram beia a puhna chungchangah hian sawi a la nei lo. Russia pawh hian Ukraine khawthlang lam chu drone leh missile hmangin a bei ve bawk a, mi panga an thih bakah mi tam tak chu power supply nei loin an awm niin Ukraine president Volodymyr Zelensky chuan a sawi ve bawk. Ukraine air force chuan Russia missile pariat leh drone 57-te chuan an rama hmun 20 chu an kap fuh tih an tarlang.