Nepal-ah ruahsurin chhiatna a thlenah mi 42 thi

Nepal rama ruahsur nasa avanga tuilian leh leimin thlengah mi 42 an thi tih Inrinni khan disaster official chuan a sawi.

Ram chhung hmun hrang hrangah Zirtawpni aṭang khan ruahsur nasa avangin harsatna an tawk a, thuneituten an ram lui eng emaw zat chu a len mai hlauhthawnawmin a awm tih an tarlang.

National Disaster Risk Reduction and Management Authority thupuangtu, Shanti Mahat chuan ruahsurin chhiatna a thlenah mi 42 an thi tawh a, chin hriat lohin mi panga an awm mek tih a sawi. Thi zinga mi 37 hi Illam district-a leimin vanga thi an nih thu a sawi bawk. Leimin vangin kawng tam tak a ping a, harsatna tawkte pui turin chhanchhuah hna thawktute pawh kein an kal a ngai a ni. Chhanchhuah hna hi helicopter leh lawng hmanga thawh a ni bawk.

Nepal hian kumtin June - September chhung hian ruahsur nasa avangin harsatna a tawk ṭhin a, chhiatna tam tak a thleng fo a ni. Kum rei vak lo aṭang khan tuilian leh leimin vanga thi hi an pung chho hle niin an sawi.

Ministry of Home Affairs chuan chhiatna thleng vang hian vawiin leh naktuk hi ram pumah public holiday atan a puang. Khaw chin zirtute chuan ruah hi nasa takin a la sur chhunzawm dawn niin an sawi a, hei vang hian tuipui hnaiha awmte chu hmun him lama insawn chhuak tura hriattir an ni.

Leiminin kawng tam tak a hnawh avangin inkalpawhna lamah harsatna nasa tak an tawk mek a, ruah a sur reng bawk avangin ram chhunga thlawhtheihna service pawh a bahlah phah bawk.