Japan-in hmeichhe PM nei dawn

Japan-a rorellai, Liberal Democratic Party (LDP) president atan Inrinni khan Sanae Takaichi-i chu thlan tlin a ni a, October 15 hian prime minister thar atan lak luh a ni ang. Japan-in hmeichhe PM a neih hmasak ber tur a ni dawn a ni.

LDP president thlannaah hian candidate panga an awm a, an zinga tling tura vote hmuh ngai zat hmu pha an awm loh avangin Inrinni khan vote hmu sang pahnihte aṭangin thlan leh a ni. Vote thlak thawh hnihnaah hian kum 64 mi, Takaichi hian farm minister Shinjiro Koizumi a hneh a ni.

Takaichi hi an hnam hmeichhiaten pasal an neih hnua an nulat lai hming an hmang chhunzawm duh lotu niin, an hnam kalphung a ni lo tiin a sawi ṭhin. Hei bakah mahni anpui neih dodaltu a ni a, an ram lal atana mipa duhtu a ni bawk. Britain prime minister hlui, Iron Lady tia sawi ṭhin Margaret Thatcher ngaisangtu a ni a, Japan Margaret Thatcher tiin amah pawh a insawi ṭhin.

Kum 1993 khan a vawi khatna atan Parliament member-ah thlan tlin a ni a, an part leh sorkarah chanvo pawimawh tak tak a chelh chho a, minister of economic security, internal affairs and gender equality pawh a lo ni tawh a ni. Japan rorel khawl kum tam tak mipain an awp tawh a ni a, tuna Parliament lower house-ah pawh hmeichhia hi 15% chauh an awm a, perfectural governor 47 zingah hmeichhia pahnih chauh an awm bawk.