Philippines-ah lirnghing vangin mi 22 an thi

Philippine ramah Thawhlehni zan rei tawh lamah magnitude 6.9-a nain lir a nghing a, chhiatna a thlenah mi 22 an thi. Lirnghing vang hian in eng emaw zat a chim a, in chimin a delhte zawn leh chhanchhuah hna thawh mek a ni.

Lir nghin ṭanna hi Cebu province-a tuipui kama khawpui Bogo aṭanga km 17 velah a ni. Bogo khawpuiah hian chenna in eng emaw zat leh fire station a chim a, kawngpui pawh thuk takah a khi bawk. Khawpuia cheng mi tam tak chu inah awm zui ngam loin zan rei hnuah kawtthlerah tlanchhuakin khawlaiah an awm tlaivar a ni.

Cebu governor Pamela Baricuatro chuan in chhe zat hi hriat chian a la ni lo tih a sawi a, hospital pawh a chhe tel niin a sawi. Hliam tuarte enkawl turin emergency medical team tirh chhuah an ni a, hliam tuar zat pawh an la hrechiang thei lo tih a sawi bawk.

Philippine Institute of Volcanology and Seismology chuan lir a nghin hnuah tuifawn na tak, tsunami a thlen a hlauhawm avangin warning a tichhuak a, mahse, hlauhthawnawm a awm lo nia sawiin warning tihchhuah pawh an sut leh nghal a ni.