Italy-in Gaza-a chhawmdawlna phurluttu puih hna titawp dawn

Italy sorkar chuan lawng rual hmanga Gaza Strip-a chhawmdawlna phurtute sipai lawng hmanga a chhawm ṭhin chu a titawp dawn tih a sawi.

Global Sumud Flotilla, civil lawng 40 leh mi 500 chuang chuanna chuan Israel-in tuipuia Palestinian ram lut tur a dante paltlang a, Gaza Strip-a chhawmdawlna phurh luh an tum dawn a ni. Lawnga chuang zingah hian parliament member, lawyer leh Sweden climate campaigner Greta Thunberg te pawh an tel.

Lawng rual hi Gaza tuipui kam aṭanga tuipui mel 150 velah a awma, Italy lawngin a chhawmna chu a titawp dawn tih Italy defence ministry chuan a sawi. Lawnga chuangte chu Israel sipaite sut tlang kher tum lo a, Cyprus lawngchawlh hmunah an thil phurhte dah turin a ngen a, mahse, lawnga chuangte hian a rawtna hi an pawm duh lo a ni. Israel sipaiten an lo beih mai a hlauthawnawm tih sawiin, Gaza hnaih chilh tak thlengin an zui dawn lo tih a sawi. Italy prime minister Giorgia Melino chuan lawng rualte chu kal zui tawh lo tura ngenin, an thiltih tum chuan US president Donald Trump-a'n Gaza Strip-a indona tihtawp a nih theihna tura rawtna leh ruahmanna a siamte a tibahlah thei dawn niin a sawi.

Italy leh Spain chuan Gaza pana lawng rual kalte chhawm zui tur hian kar liam ta khan an navy lawng liante an tir a ni. Hetih lai hian Israel chuan lawng rualin Gaza an lut tur hi a dang dawn tih a sawi thung a, Gaza Strip-a Hamas nena an indo mek avangin tuipui lama daidanna an lo siam pawh dan ang veka tih a ni, an ti.