Cambodia PM-in civil mite hnawt chhuakah Thailand sipaite puh

Cambodia prime minister Hun Manet chuan Thailand nena ramri an inchuhna huam chhunga cheng, civil mi eng emaw zat chu Thailand sipaiten an hnawt chhuak niin a sawi.

Hetih lai hian Thailand sipaite chuan Cambodia mite hi an ram chinah dan loin an awm niin an sawi ve thung.

Cambodia leh Thailand hi ramri inchuh vangin July thla tawp lam khan an inkap a, mi 43 velin an thih phah a ni. Mi sing tel chu himna zawngin an tlanchhiat phah bawk. US president Donald Trump-a nawrna avangin inkahhai an puang a, mahse, an inremna siam bawhchhiahah a inpuh zui reng a ni. Ram pahnihte hian ramri km 800-a thui neiin, ramria temple pawimawh, kum zabi 11-na hunlaia sak Preah Vihear Shiva temple leh a awmna bial neitu nih inchuhin kum tam tak an buai tawh a ni.

Hun Manet chuan September 17 khan United Nations secretary-general Antonio Guterres hnenah lehkha a thawn a, Thailand sipaite chuan an ram inchuh mek hi an hung thu sawiin, hun rei tak ramri hrula lo cheng tawh, Cambodia civil mite chu an chenna aṭangin an hnawt chhuak a ni, a ti. Chhungkaw 25 te chu hnawh chhuah an ni tawh a, mi dang pawh hnawh chhuah belh an tum tih Thailand sipai thupuangtu chuan a sawi niin a tarlang.