SKorea Unification Church hruaitu manna thupek tichhuak turin ngen

South Korea investigator-te chuan an ram president hlui, Yoon Suk Yeol-a nupui, Kim Keon Hee leh ram hruaitu dang ṭhenkhatte thamna pea puh chungchanga Unification Church hruaitu, kum 82 mi Hak Ja Han manna thupek tichhuak turin court-ah ngenna an thlen. Unification Church hian Cambodian development project an thawh theihna tur leh, thil danga sorkar duhsakna an dawn theihna atan thamna hi an pe nia puh a ni.

President hlui nupui, Kim hi thamna laa puhna bakah, legislative candidate tur thlannaa inrawlh leh a mimal hlawkna tura stock supply lama inrawlhah puhin thubuai siamsak a ni a, thla hmasa khan man a ni. A pasal hi nikum December thlaa martial law a puan kaihhnawihah President a nihna aṭang paihthlak a nih hnuin thubuai siamsak a ni a, man a ni tawh bawk.

Hak Ja Han hi Unification Church dintu, Sun Myung Moon nupui a ni a, a pasal thih hnuah an kohhran hruaitu nihna hi a chelh zui a ni. Hak leh Unification Church chuan Kim hnena thamna pea puhna hi thu dik lo a nih thu an sawi. Mahse, investigator-te chuan sum bakah tlereuh manto tak tak Kim hi an pe niin an sawi thung. Nilaini khan Han hi darkar 10 dawn chu invetigator-te hian thu an zawtfiah a ni.